“ARMOEDE moet nie gesien word as ’n rede om bakhand te staan nie, maar liewer as ’n inspirasie om groter dinge in die lewe te bereik, want dit is waar ek vandaan kom.

“Die grootste faktor wat ’n besigheidspersoon dryf tot sukses, is die vrees vir armoede,” sê mnr. Ismail Jackson (57), direkteur van Alpha Civil.

Jackson is gebore in Riverview, Worcester, en het matriek aan Esselenpark Sekondêr voltooi. “Ek moes noodgedwonge gaan werk en deur korrespondensiekursusse my as tekenaar bemagtig. Ek het hierna as tekenaar by PA Venter en daarna by Federated Timbers as tekenaar en bestekopnemer gewerk.”

By Federated Timbers het hy tot senior vlak gevorder.

Op 27-jarige ouderdom het Jackson besluit om sy eie onderneming te begin en het saam met ’n vennoot ’n boukontrakteursmaatskappy begin. Hulle het ’n redelike aantal kontrakte gekry en moes volgens Jackson dag en nag werk om suksesvol te wees.

Volgens Jackson kon sy onderneming as gevolg van omstandighede in die vroeë tagtigerjare nie die eksterne aanslae weerstaan nie. “Dit het my net meer gedryf om suksesvol wees.

“Ek het net weer opgestaan, my hoed afgestof en maar weer die uitdaging aangepak. Ek het geloop, geval, opgestaan en voortgegaan totdat ek my visie verander en myself oorreed het dat dit wat ek om besigheidshalwe ontbeer het, nie meer tot my eie voordeel is nie, maar dat dit ’n prys is wat ek bereid is om te betaal om ’n weg te baan vir die generasie wat volg.”

Só het Tema Projects tot sy reg gekom en uiteindelik met Alpha Civil saamgesmelt.

Jackson het vier kinders, drie dogters wat almal reeds getroud is en een seun wat nog by hulle aan huis is.

Volgens Jackson is sy visie vir ’n beter Worcester eenvoudig.

“Ek wil sien dat voorheen benadeelde sakeondernemings of klein plaaslike ondernemings in groter ondernemings ontwikkel en om deel te word van Worcester se hoofstroom van besigheid,” sê Jackson.

Jackson bestuur namens die Worcester Besigheidsforum die Breedevallei Vennootskap-portefeulje en dien ook in die forum se uitvoerende bestuur.

“Ons probeer om as ’n gesin soveel as moontlik saam vakansie te hou; gewoonlik op die Tuinroete.” sê Jackson. Ná ure speel hy af en toe ’n potjie gholf en behou ’n gesonde lewenstyl.

’n POSITIEWE uitkyk en ’n visie van ’n beter, skoner en veiliger Worcester. Dit is waarom Willem Burger (61), een van die eienaars van NTT Worcester Volkswagen, glo dat Worcester ’n blink toekoms het.

Volgens Burger, wat in die “goue stad” van Johannesburg gebore is, sien hy dat Worcester groot potensiaal het en dat “ons stedelike verval in ons dorp moet verhoed”.

Burger het verduidelik dat dit belangrik is om ’n omgewing te skep waar dit aangenaam is vir mense om sake te doen.

Volgens Burger het hy ná skool ’n BA Honneursgraad in Geesteswetenskappe aan die voormalige Randse Afrikaanse Universiteit (RAU), wat nou die Universiteit van Johannesburg genoem word, verwerf.

Hy het toe verder gaan studeer aan die Universiteit van Stellenbosch, waar hy ’n kursus in besigheidsbestuur gedoen het. Burger het sy diploma ontvang nadat hy die kursus voltooi het.

In 1983 het Burger die motorbedryf betree en sy eerste werk by BMW SA in Johannesburg gekry.

Ná ’n aantal jare het hy toe besluit om homself in Kaapstad te vestig, en het by Auto Atlantic as ’n handelaarshoof aangesluit.

In 1996 het Burger besturende direkteur van Sches Groep (Nissan, Fiat en Alfa Romeo) geword.

Volgens Burger het hy saam met vennote in 2007 Drosdy Motors gekoop by die voormalige eienaar, Chris Blom. Hy en sy gesin het toe na Worcester getrek.

Burger bly saam met sy gesin op ’n klein plasie met die naam Kuruma in Brandwachtvallei. Hy het drie kinders, twee seuns en ’n dogter.

Volgens Burger is hy ’n voormalige president van die Rotaryklub op Worcester en nog steeds ’n aktiewe lid.

“Elke jaar het ons (Rotaryklub) saam met vier skole die “tree of life”-projek in die Mountain Mill Mall waar ons geskenke insamel vir die minderbevoorregte mense,” sê Burger.

Burger bestuur namens die Worcester Besigheidsforum (WBF) die Breedevallei Vennootskap-portefeulje (as ’n addisionele lid) en dien ook in die forum se uitvoerende bestuur.

“Ons wil die sentrale sakekern afbaken en kyk na ’n tariefaanpassing sodat ons addisionele dienste by die Breedevallei Munisipaliteit kan kry - soos skoonmaakdienste, sekuriteit en die algemene verfraaiing van die dorp,” sê Burger.

Burger is ’n gesinsvaste persoon met ’n passie vir lees en die teater, veral opera.

“Ek en my gesin gaan gereeld Kaapstad toe om opera te kyk,” sê Burger.

’n PLAASLIKE sakeman wat altyd probeer om te help waar hy kan. Dít is Johannes Kleinhans (47), besturende direkteur van Masjienburo,’n familieonderneming wat 35 jaar gelede deur sy pa, nou afgetree, begin is.

Volgens Kleinhans, wat op Bethlehem in die Vrystaat gebore is, sien hy daagliks die uitnemende potensiaal wat Worcester het en aan sy inwoners kan bied.

“As elke Worcesteriet sy kant bring, kan ons hierdie dorp tot die beste in die Boland uitbou en dit tot sy regmatige plek as hoofsentrum van die Boland laat gedy, maar dan moet ons inwoners en sakelui saamwerk. Hier is te veel mense wat op ander se rug ry.”

Kleinhans sê sy pa het die onderneming in 1977 begin waarna hy die bestuur en eienaarskap in 1998 oorgeneem het. Hyself werk sedert 1989 by Masjienburo.

Volgens Kleinhans het hy ná skool ’n driejaarkursus in bemarking en verkoopsbestuur by die Tygerberg Kollege in Bellville gevolg. “Ná ek die kursus voltooi het, het ek aangesluit by Masjienburo en in 1998 eienaarskap oorgeneem met die aftrede van my pa,” sê Kleinhans.

Kleinhans het drie kinders, ’n dogter Anke, wat geleentheidsbestuur by Prestige Academy studeer, ’n seun Adolf, wat tans in gr. 11 by die Hoërskool Montana is en nog ’n dogter, Tina, wat in gr. 6 by die Laerskool Worcester-Oos is.

Kleinhans is ook een van die stigters van die Worcester Besigheidsforum (WBF) en dien in die uitvoerende bestuur sedert die stigting daarvan.

Die Worcester Besigheidsforum het onlangs sy algemene jaarvergadering gehou en die nuwe bestuur en uitvoerende lede is intussen verkies. Kleinhans is weer as tesourier van die uitvoerende liggaam verkies en is ook verantwoordelik vir die forum se administrasie en finansies.

Volgens Kleinhans is daar twee aspekte wat Worcester ’n beter dorp kan maak. “Een is die veiligheid van elkeen in die dorp en die ander die netheid van jou omgewing. Aan die einde van die dag is dit hoe jy jou dorp bemark wat sy vordering en die sukses van investerende maatskappye sal verseker,” sê Kleinhans.

Kleinhans handhaaf ’n gesonde en aktiewe lewenstyl. Hy oefen minstens vyf dae per week. Hy hou van die buitelewe en gaan gereeld met sy gesin op safari, gaan kampeer en doen diepseeduik.